Michael Davitt caillte

simu

Ó shuíomh RTÉ: http://www.rte.ie/news/2005/0620/davittm.html

Gael

Is mór an trua é. Agus é cuíosach óg go fóill. Seo píosa faoi as LÁ:




Bhí aos litríochta faoi ghruaim inné leis an scéala go raibh an file Michael Davitt (55) ar shlí na fírinne.
Shíothlaigh sé maidin Dé Domhnaigh i ndiaidh gur bhuail taom croí é ag a bhaile i Sligeach.
Ba é Michael, in éineacht le dream an-bheag eile, a chuir friotal na Gaeilge ar shaol na cathrach, agus a chuir tús leis an iris cheannródaíoch, Innti.
Ag caint ar a sheanchomrádaí éigse, dúirt Gabriel Rosenstock:
“Ag deireadh na seascaidí, bhí athruithe sóisialta agus cultúrtha ag teacht chun cinn.
“Bhí deis ag glúin óg seilbh a fháil ar an teanga agus bhí Michael Davitt ar dhuine de na daoine a mháirseáil go Baile Átha Cliath nuair a bhí Scoil Dhún Caoin i mbaol a dúnta agus bhí sé ann nuair a d’ionsaigh na Gardaí iad os comhair Ardoifig an Phoist.”
Ba mar fhile ba mhó a thuill sé clú, idir náisiúnta agus idirnáisiúnta.
“D’éag an file ba mhó a bhí ina fhile iontach ach ag an am céanna a spreag filí óga,” arsa Pádraig Ó Snodaigh, an duine a d’fhoilsigh an chéad chnuasach aige, Bligeard Sráide, sa bhliain 1983.
‘Treallchogaí cathrach na filíochta’ a tugadh air agus, mar a dúirt Gabriel Rosenstock, “thug sé an fhilíocht amach as póirsí dorcha na n-ollscoileanna go dtí an tsráid agus na pubanna.”
“Ba bheag aird a bhí ar fhilíocht na Gaeilge go dtí sin agus bhain sé cearta don teanga sa réimse litríochta.
“Gan é, ní luafaí an Ghaeilge i leabhair amhail The Oxford Companion to Irish Literature.”
Seolfar a chorpán go Séipéal Naomh Pádraig i gCathair Chorcaí anocht ar 7.30, áit a léifear aifreann na sochraide ar 2.00, Dé Céadaoin. Beidh seirbhís eile ag Créamatóiriam Newlands, Déardaoin, ar 2.00in.

Dalta

Mór an trua, gan dabht. Ar dheis Dé go raibh a anam agus ár mothuithe go dtí a chlann.