Cosc ar ghríosú chun fuath in éadan Gaelgeoirí molta ag CnaG

Tá molta ag Uachtarán Chonradh na Gaeilge, Daithí Mac Cárthaigh, go mbeadh cosc ar ghríosú chun fuath in éadan Gaeilgeoirí clúdaithe faoi reachtaíocht.
Faoi láthair tá sé mídhleathach fuath a ghríosú in aghaidh daoine ar naoi bhforas, mar atá, cine, dath, náisiúntacht, reiligiún, bunús eitneach nó náisiúnta, ballraíocht den lucht siúil nó claonadh gnéasach.
De réir Mhic Chárthaigh, áfach, ba cheart go mbeadh gríosú chun fuath ar fhoras teanga clúdaithe san Acht Ghríosú chun Fuath 1989.
Déanann an Roinn Dlí agus Cirt athbhreithniú ar an Acht gach dhá bhliain agus tá tús curtha acu leis an athbhreithniú is déanaí le tamall gairid anuas.
Dheimhnigh an Roinn go bhfuil gríosú chun fuath sna meáin clúdaithe faoin acht.
“Níl aon amhras ach gur gríosú chun fuath in éadan chainteoirí Gaeilge atá i gceist le go leor de na rudaí a scríobhtar agus a deirtear fúthu sna meáin,” arsa Mac Cárthaigh.
“Má dhéantar iarracht a rá, ‘is Gaeilgeoir thú dá bhrí sin…’ is iarracht atá ann pobal a ionsaí agus a mhaslú agus fuath a spreagadh in éadan an phobail sin,” arsa sé.
“Nuair a deirtear gur teanga mharbh í an Ghaeilge, an rud atáthar ag iarraidh a dhéanamh ná séanadh go bhfuil éinne in Éirinn in ann an teanga a labhairt agus dá bhrí sin nach bhfuil gá aon seirbhísí teanga a thabhairt dóibh.
“Ní pobal dofheicthe sinn agus ba cheart go mbeadh cosaint againn ó ionsaithe dá leithéid.”
Anuraidh craoladh taifead den láithreoir aitheanta, Aoife Ní Thuairisc, ar stáisiún raidió náisiúnta, agus rinne na láithreoirí ar an gclár magadh fúithi agus aithris uirthi agus í ag labhairt i nGaeilge.
De réir Mhic Chárthaigh, ba shampla de ghríosú chun fuath a bhí ann, mar aon leis an eachtra anuraidh inar maslaíodh Daithí Ó Sé ar an gclár Charity You’re a Star, de bharr gur chainteoir Gaeilge atá ann.
Tá an fhoráil chéanna ag an Press Council nua-cruthaithe cód chleachtais maidir le gríosú chun fuath is atá ag an Acht a ritheadh in 1989.
Clúdaítear teanga áfach, in Airteagal 2 den Fhógairt Uilechoiteann Cearta Daonna mar cheann de na forais nach féidir idirdhealú a dhéanamh air.